Reshjet jashtëzakonisht të dendura të dëborës në Japoni gjatë dy javëve të fundit kanë shkaktuar humbjen e jetës së 30 personave, bëjnë me dije autoritetet lokale. Mes viktimave është edhe një grua 91-vjeçare, e cila u gjet e pajetë jashtë banesës së saj, e mbuluar nga një shtresë dëbore rreth tre metra e lartë.
Rajoni më i goditur është Aomori, ku në zonat më të thella trashësia e dëborës ka arritur deri në 4.5 metra, duke paralizuar jetën e përditshme dhe duke izoluar komunitete të tëra. Përballë situatës emergjente, qeveria qendrore ka dislokuar trupa ushtarake për të ndihmuar në pastrimin e rrugëve, evakuimin e banorëve dhe shpërndarjen e ndihmave.
Kryeministrja Sanae Takaichi zhvilloi të martën një mbledhje të posaçme të kabinetit, ku u kërkoi ministrive dhe autoriteteve vendore të marrin masa të menjëhershme për të shmangur viktima të tjera dhe për të garantuar sigurinë e qytetarëve.
Sipas autoriteteve meteorologjike, një masë e fuqishme ajri i ftohtë ka goditur bregdetin e Detit të Japonisë, duke sjellë reshje dëbore shumë mbi nivelet normale sezonale. Në disa zona është regjistruar më shumë se dyfishi i mesatares së zakonshme për këtë periudhë.
Agjencia e Menaxhimit të Zjarrfikësve dhe Fatkeqësive konfirmoi se nga 20 janari deri më sot, kushtet ekstreme të motit kanë rezultuar fatale për të paktën 30 persona, ndërsa dhjetëra të tjerë janë lënduar.
