Dy vatra zjarri janë regjistruar brenda një intervali të shkurtër kohor në qytetin e Vlorës, duke bërë që shërbimet zjarrfikëse të angazhohen njëkohësisht në dy ndërhyrje.
Sipas informacioneve paraprake, zjarri i parë ka rënë në një biznes të tipit “fast food”, ku dyshohet se flakët janë shkaktuar nga një bombol gazi. Si pasojë janë shkaktuar dëme materiale në ambientet e biznesit, ndërsa ndërhyrja e zjarrfikësve bëri të mundur shuarjen e flakëve.
Ndërkohë, një vatër e dytë zjarri është regjistruar në një kabinë elektrike pranë shkollës “Ali Demi”. Sipas autoriteteve, për arsye sigurie është ndërprerë furnizimi me energji elektrike në zonë, ndërsa flakët janë vënë nën kontroll për të shmangur përhapjen e tyre drejt objekteve përreth.
Nga të dyja ngjarjet nuk raportohen persona të lënduar.
Autoritetet po punojnë për të përcaktuar shkaqet e zjarreve, ndërsa rrethanat e plota të ngjarjeve mbeten nën verifikim.
