Partia Agrare Ambientaliste nuk u bë pjesë e polit të tre të politikës shqiptare, teksa formacioni që do të sfidojë PS dhe PD në zgjedhjet e 2025 u krijua nga LZHK e Dashamir Shehit dhe ish-deputetët demokrat Enkelejd Alibeaj, Flutura Açka dhe Arbi Agalliu.
Për kreun e saj Agron Duka dalja vetëm në zgjedhje nuk është opsion për PAA, pasi Kodi i ri Zgjedhor e penalizon si parti e vogël, ndaj ai i shtriu dorën për një aleancë Partisë Demokratike.
Por, Duka gjatë një interviste në A2 CNN, i vendosi një afat PD dhe kreut të saj Sali Berisha për lidhjen e koalicionit, duke kërkuar që deri në tetor të jenë selektuar figurat që do të kandidojnë në zgjedhje.
“Në këto kushte gjykoj unë, me pragmatizëm, partitë e vogla duhet të bëjnë aleancë me një grupim të madh dhe të dalin me një sigël aleance. Hapi i parë është që të gjejmë akord me këtë që jemi sot, me grupimin më të madh që është PD. Natyrisht që bisedojmë por e kemi shumë të vështirë pasi lideri i opozitës është në izolim. Diskutojmë gjithmonë me këtë pjesën tjetër, me Nokën, Bylykbashin për Durrësin. Ajo që unë dhe PAA kemi kërkuar publikisht duhet ti ketë shkuar në vesh zotit Berisha. Brenda shtatorit jo për hall të Partisë Agrare Ambientaliste, por për leverdi të gjithë opozitës duhet të zgjidhet problemi i koalicioneve, pasi nuk ka kohë. Jemi në limitet e kohës, nëse në tetor nuk selektojmë njerëzit që do të kandidojnë, atëherë do e kemi të vështirë të mbledhim votat në të gjithë Shqipërinë”, tha Duka.
Në vijim Duka sqaroi edhe kushtet që PAA ka për firmosjen e një koalicioni me një nga partitë e mëdha, duke thënë se kërkon përfaqësues në lista për 10 nga 12 qarqet, e po ashtu të paktën 1 kandidat në listën e mbyllur që përkthehet në deputet të sigurt sipas Kodit të ri Zgjedhor.
