Lëvizjet në radhët e Policia e Shtetit vijojnë, teksa drejtori i Drejtorisë Vendore të Policisë në Kukës, Loard Sallaku, ka dhënë dorëheqjen nga detyra.
Largimi i tij vjen në kuadër të një vale ndryshimesh të nisura një ditë më parë nga drejtuesi i Policisë së Shtetit, Skënder Hita, që përfshijnë emërime dhe ristrukturime në disa drejtorë vendore dhe komisariate në vend.
Në kuadër të këtyre lëvizjeve, janë bërë një sërë emërimesh të reja në struktura të ndryshme të policisë. Mes tyre, Erion Ahmeti është emëruar në Drejtorinë Vendore të Policisë në Fier, ndërsa Andi Banushi në Policinë e Elbasanit. Po ashtu, Krenar Guçe merr detyrën e shefit të rendit në Përmet.
Ndryshime ka pasur edhe në Tiranë, ku Alfred Cenaj është caktuar në krye të Komisariatit nr. 2, ndërsa Gerald Toska është emëruar shef i Komisariatit të Fierit. Në nivele të tjera drejtuese, Dritan Muça dhe Dritan Malaj janë emëruar zëvendësdrejtorë për hetimin e krimit në Vlorë dhe Berat.
Gjithashtu, Islor Islami është emëruar në Drejtorinë e Përgjithshme të Policisë së Shtetit në një pozicion që lidhet me mbështetjen hetimore të krimit të organizuar, ndërsa Erdit Rreçeku do të drejtojë Komisariatin e Policisë në Peqin.
Këto ndryshime konsiderohen pjesë e një riorganizimi më të gjerë të strukturave policore, ndërsa mbetet për t’u parë se cilat do të jenë efektet e tyre në funksionimin e rendit dhe sigurisë në vend.
