Presidenti amerikan Donald Trump ka reaguar sërish për situatën në Ngushticën e Hormuzit, duke kritikuar mënyrën se si Irani po menaxhon kalimin e anijeve në këtë korridor jetik.
Në një postim në rrjetin e tij Truth Social, Trump u shpreh se Irani po bën një “punë shumë të dobët” dhe madje “të pandershme” në lejimin e kalimit të naftës, duke theksuar se kjo nuk përputhet me marrëveshjen e arritur më parë.
Ai paralajmëroi gjithashtu për raportimet se Irani mund të ketë vendosur tarifa për anijet që kalojnë nëpër këtë ngushticë strategjike. Sipas tij, një veprim i tillë duhet të ndalet menjëherë.
“Ka raportime se Irani po vendos tarifa për cisternat. Më mirë të mos e bëjnë dhe, nëse po e bëjnë, duhet të ndalojnë tani”, theksoi Trump.
Ndërkohë, të dhënat e verifikuara tregojnë se lëvizja detare në këtë zonë vazhdon, me të paktën nëntë anije që kanë kaluar gjatë ditës së sotme.
Ngushtica e Hormuzit mbetet një nga rrugët më të rëndësishme për transportin global të naftës, dhe çdo tension apo kufizim në këtë zonë ka ndikim të drejtpërdrejtë në tregjet ndërkombëtare të energjisë.
