Presidenti amerikan Donald Trump ka bërë një deklaratë të fortë lidhur me zhvillimet e fundit në Lindjen e Mesme, duke theksuar se Shtetet e Bashkuara të Amerikës nuk ka nevojë për mbështetjen e aleatëve në operacionet ushtarake kundër Irani.
Në një postim në platformën Truth Social, Trump ka kritikuar hapur NATO-n, duke u shprehur se shumica e vendeve anëtare nuk janë të gatshme të përfshihen në operacionet ushtarake amerikane. Ai e cilësoi aleancën si një “rrugë me një kah”, duke nënkuptuar se SHBA ka dhënë më shumë sesa ka marrë nga partnerët e saj ndër vite.
“Ne nuk kemi nevojë për ndihmën e askujt”, theksoi Trump, duke argumentuar se fuqia ushtarake amerikane është e mjaftueshme për të përballuar situatën aktuale.
Deklarata e tij vjen në një moment të tensionuar në rajon, ndërsa konflikti me Iranin vazhdon të përshkallëzohet dhe ka ngritur shqetësime globale për sigurinë dhe tregtinë ndërkombëtare, veçanërisht në zona strategjike si Ngushtica e Hormuzit.
Ironikisht, kjo deklaratë pason kërkesat e mëparshme të Trump për mbështetje nga aleatët, çka tregon një ndryshim në tonin dhe qasjen e tij ndaj bashkëpunimit ndërkombëtar.
Qëndrimi i presidentit amerikan pritet të ndikojë në marrëdhëniet me partnerët perëndimorë dhe të shtojë debatet mbi rolin e NATO-s në konfliktet globale.
