Mijëra shqiptarë të diasporës u mblodhën më 28 qershor në Waterbury, Connecticut, në Shtetet e Bashkuara, në një protestë solidariteti me demonstratat që po zhvillohen në Shqipëri.
Pjesëmarrësit shprehën mbështetjen e tyre për protestuesit në Tiranë, duke theksuar lidhjen e tyre me zhvillimet në vend.
“Zemra jonë rreh sot në Tiranë. Dhimbja e tyre është edhe dhimbja jonë,” u shprehën disa prej protestuesve gjatë tubimit.
Në protestë u dëgjuan edhe thirrje drejtuar kryeministrit Edi Rama për dorëheqje. Sipas organizatorëve, aktiviteti synonte të shprehte solidaritet me protestat qytetare dhe të kërkonte më shumë transparencë dhe llogaridhënie në qeverisje.
Në tubim morën pjesë edhe të rinj të diasporës, të cilët u shprehën se dëshirojnë që Shqipëria të krijojë kushte që t’u mundësojnë një ditë kthimin dhe kontributin e tyre në zhvillimin e vendit.
Protestat në Shqipëri, të cilat fillimisht nisën si reagim ndaj një projekti zhvillimi në një zonë të mbrojtur, janë zgjeruar me kërkesa më të gjera politike dhe institucionale, sipas organizatorëve të lëvizjes.
