Parlamenti në seancën e 12 shtatorit do të shqyrtojë vendimin e Gjykatës Kushtetuese për mandatin e deputetes Olta Xhaçka. Deputetja e Partisë Demokratike Dhurata Çupi, tha dje se vendimet e Gjykatës Kushtetuese nuk mund të zhbëhen. Ajo shtoi se PS-së nuk i ka mbetur asnjë argument mbrojtës ndaj Olta Xhaçkës. Çupi u shpreh se edhe deputeti i PS-së Vullnet Sina ka përfituar miliona lekë nga buxheti i shtetit dhe se dhe atij duhet t’i hiqet mandati. Sipas saj, opozita ka denoncuar fort korrupsionin madhor në qeverisje. “Kuvendi votoi pro për të shqyrtuar mandatin e Xhaçkës në seancën e 12 shtatorit.
Në një vend demokratik, nuk mund të zhbëhen vendimet e Kushtetueses. PS nuk ka më asnjë argument mbrojtës ndaj Xhaçkës. Ne në mënyrë të vazhdueshme kemi denoncuar korrupsionin dhe arrogancën e qeverisë. Maxhoranca në tërësi mbulon të keqen me një të keqe më të madhe. Edhe Vullnet Sina ka përfituar miliona nga buxheti publik. Është i paimagjinueshëm shpërdorimi i detyrës nga deputetët e PS.
Ka raporte të Transparency International se Vullnet Sinaj ka ndikuar për të kaluar disa ligje.E kemi çuar Xhaçkën në Gjykatën Kushtetuese 2 herë. Ne nuk mund të heshtim ndaj gjërave që nuk shkojnë, që janë në kundërshtim me Kushtetutën e vendit. Sa i përket SPAK, ne mendojmë se ka gabuar me z Sali Berisha, duke goditur liderin e opozitës, por ne mbështesim punën e drejtësisë, pasi 26 kryetarë bashkie janë nën hetim”, tha deputetja Çupi për “News 24”.
