Një debat me tone të forta është zhvilluar në Kuvend, ku deputeti i opozitës Belind Këlliçi është përplasur me ministrin e Jashtëm Ferit Hoxha, duke ngritur akuza për konflikt interesi dhe përfshirje indirekte në një çështje hetimore.
Gjatë seancës, Këlliçi i kërkoi sqarime ministrit lidhur me një rast të hetuar nga SPAK, ku përmendet një person me të njëjtin mbiemër, duke sugjeruar mundësinë e një konflikti interesi në raport me institucionet e drejtësisë.
Nga ana e tij, Hoxha i hodhi poshtë këto pretendime, duke theksuar se nuk ka asnjë lidhje me çështjen dhe se duhet respektuar prezumimi i pafajësisë. Ai e cilësoi të papranueshëm “linçimin publik” dhe përfshirjen e familjarëve në debat politik.
Përplasja u thellua edhe më tej kur Këlliçi ngriti çështjen e disa mesazheve të publikuara në media, për të cilat ai pretendon se përmbajnë fyerje ndaj shqiptarëve në Maqedonia e Veriut. Deputeti kërkoi një përgjigje të qartë nëse këto mesazhe janë autentike dhe nëse ministri mban përgjegjësi për përmbajtjen e tyre.
Në përgjigje, Hoxha deklaroi se qëndrimet zyrtare të tij dhe të ministrisë nuk shprehen përmes aplikacioneve si WhatsApp apo Signal, por vetëm përmes kanaleve institucionale dhe deklaratave publike.
Debati, që zgjati për disa orë, u fokusua gjithashtu edhe te negociatat për anëtarësimin në Bashkimin Evropian dhe raportet mbi drejtësinë, duke reflektuar tensionet e vazhdueshme politike mes mazhorancës dhe opozitës.
