Kandidatura e Shqipërisë për të organizuar një samit të ardhshëm të NATO-s është përballur me pasiguri pas takimit të fundit të aleancës në Ankara, sipas një raportimi të medias amerikane Bloomberg.
Sipas artikullit, kryeministri Edi Rama kishte lobuar që Shqipëria të priste samitin e NATO-s në vitin 2027, por sjellja e tij gjatë takimit ngriti pikëpyetje te disa prej zyrtarëve dhe udhëheqësve të pranishëm.
Bloomberg raporton, duke iu referuar burimeve me dijeni për diskutimet me dyer të mbyllura, se disa të pranishëm u ndien në siklet kur Rama iu drejtua presidentit turk Recep Tayyip Erdoğan me termin “sulltan”. Sipas raportimit, komenti u perceptua si një shaka, duke pasur parasysh marrëdhënien e afërt mes dy liderëve.
Media amerikane shkruan gjithashtu se Rama ishte këmbëngulës në kërkesën për organizimin e samitit të ardhshëm, duke pretenduar se sekretari i përgjithshëm i NATO-s, Mark Rutte, ia kishte premtuar Shqipërisë këtë mundësi.
Komunikata e samitit të NATO-s të vitit 2025 parashikonte që Shqipëria të priste një takim të aleancës pas Turqisë, por pa përcaktuar një datë konkrete. Në deklaratën e publikuar pas takimit të fundit, sipas artikullit, nuk u përmend vendi ku do të zhvillohej samiti pasardhës.
Raportimi ndalet edhe te shpenzimet shqiptare për mbrojtjen. Sipas Bloomberg, Shqipëria ka siguruar financim për blerjen e armëve, duke e çuar buxhetin e mbrojtjes në rreth 2.15 për qind të Prodhimit të Brendshëm Bruto për vitin 2026. Një vit më parë, kjo shifër raportohej në 1.48 për qind.
Në artikull përmendet edhe mbështetja e Ramës për projektet turistike të drejtuara nga Jared Kushner në bregdetin shqiptar, të cilat kanë shkaktuar kundërshtime dhe protesta në vend.
Pretendimet për diskutimet private dhe reagimet e zyrtarëve të NATO-s bazohen në burimet e cituara nga Bloomberg. Deri në publikimin e raportimit, zyra e kryeministrit Rama nuk kishte dhënë një koment.
