Kreu i Partisë Demokratike, Sali Berisha, ka reaguar ndaj vendimit të grupit parlamentar të Partisë Socialiste për të mos mbështetur kërkesën e SPAK për heqjen e imunitetit të ish-zëvendëskryeministres Belinda Balluku.
Gjatë fjalës së tij në takimin e përjavshëm me demokratët para Kryeministrisë, Berisha akuzoi kryeministrin Edi Rama dhe mazhorancën socialiste se po mbrojnë Ballukun për të shmangur përgjegjësitë për aferat e dyshuara me fondet publike.
Sipas tij, vendimi i deputetëve socialistë për të mos votuar heqjen e imunitetit të Ballukut është një akt që, sipas tij, synon ta përdorë atë si mburojë politike për akuzat që lidhen me qeverinë.
Berisha e cilësoi qeverinë si një “organizatë kriminale” dhe akuzoi kryeministrin Rama se qëndron në krye të saj. Ai shtoi se zhvillimet e fundit kanë nxjerrë në pah, sipas tij, mënyrën se si funksionon pushteti aktual.
Në fjalën e tij, lideri i opozitës u bëri gjithashtu thirrje intelektualëve shqiptarë që të reagojnë dhe të mos qëndrojnë, sipas tij, indiferentë ndaj zhvillimeve politike në vend.
Berisha theksoi se intelektualët duhet të jenë mbrojtës të interesave të publikut dhe të kontribuojnë në debatet për çështjet që lidhen me drejtësinë dhe qeverisjen në Shqipëri.
