Kryetari i Partisë Demokratike, Sali Berisha, ka vijuar deklaratat kritike ndaj qeverisë gjatë një bashkëbisedimi me qytetarët në rrjetet sociale.
Gjatë komunikimit të tij, Berisha komentoi edhe daljen publike të ish-ministres së Infrastrukturës dhe Energjisë, Belinda Balluku, në ceremoninë e dorëzimit të detyrës, duke e kritikuar mënyrën se si ajo u prezantua përpara stafit të ministrisë.
Sipas tij, Balluku u paraqit si e suksesshme pavarësisht akuzave dhe hetimeve që lidhen me aktivitetin e saj në qeveri.
Berisha deklaroi se situata politike në vend është shqetësuese dhe i bëri thirrje qytetarëve të bashkohen për ndryshim politik.
“Këto janë zhvillime dramatike. Është një kushtrim për të gjithë qytetarët që të bashkohemi për largimin sa më parë të Ramës”, u shpreh ai.
Deklaratat e kreut të opozitës vijnë në një moment kur debati politik në vend është intensifikuar, ndërsa zhvillimet rreth hetimeve dhe ndryshimeve në qeveri kanë shtuar përplasjet mes mazhorancës dhe opozitës.
