Akuzat e vazhdueshme për censurë nga ana e liderit të opozitës, Sali Berisha, duket se bien ndesh me të dhënat zyrtare të publikuara nga Autoriteti i Mediave Audiovizive.
Sipas monitorimit të muajit shkurt, Partia Demokratike rezulton forca politike që dominon hapësirën televizive në vend, duke zënë 74.70% të kohës totale. Në vend të dytë renditet Partia Socialiste me 23.85%, një diferencë e ndjeshme prej mbi 50 pikësh përqindje.
Ndërkohë, partitë e tjera kanë një prani minimale në ekranet kombëtare: Partia e Lirisë me 0.44%, Partia Republikane Shqiptare me 0.37% dhe subjekti “Mundësia” me 0.63%.
Në nivel individual, Sali Berisha rezulton politikani më i pranishëm në media, me 34.87% të kohës televizive, i ndjekur nga kryeministri Edi Rama me 26.58%.
Në listën e politikanëve më të ekspozuar mediatikisht përfshihen edhe figura të tjera si Arbjan Mazniku, Taulant Balla, Elisa Spiropali, Pirro Vengu dhe Erion Braçe. Nga opozita, në 10-shen kryesore renditen edhe Luçiano Boçi dhe Gazment Bardhi.
Ndërkohë, Presidenti Bajram Begaj ka pasur një prani më të kufizuar mediatike, me vetëm 1.61% të kohës televizive.
Të dhënat e AMA-s tregojnë se hapësira mediatike në Shqipëri dominohet nga dy forcat kryesore politike, por me një avantazh të dukshëm për opozitën gjatë kësaj periudhe.
