Kryetari i Partisë Demokratike, Sali Berisha, ka akuzuar sërish ashpër kryeministrin Edi Rama dhe ministren Belinda Balluku, duke e cilësuar projektin e Unazës së Madhe si “vjedhjen më të madhe infrastrukturore të qeverisë”.
Sipas Berishës, vetëm segmenti i fundit prej 17 kilometrash i këtij projekti ka një kosto të fryrë deri në 450 milionë euro, çka do të thotë rreth 18 milionë euro për çdo kilometër, një shifër që ai e konsideron të papranueshme dhe të pashembullt në vendet demokratike.
“Terreni ishte i hapur, por kostoja u rrit në mënyrë të frikshme”
Berisha deklaroi se infrastruktura e zonës, nga TEG-u deri në Kodra e Priftit e më tej drejt Linzës, ka qenë e përgatitur dhe me trase të hapur, çka sipas tij e bën edhe më të pakuptimtë faturimin e një shume kaq të lartë:
“Unaza në atë segment ka pasur terren të hapur. Megjithatë, 17 kilometrat janë shitur për 450 milionë euro, kur realisht duhej të kushtonin rreth 200 milionë.”
Ai e cilësoi këtë si shembull tipik të abuzimeve të qeverisë, duke thënë se “nuk ekziston rrugë në botë që të kushtojë 18 milionë euro për kilometër”.
Berisha: Rama dhe Balluku arkitektët e aferës
Ish-kryeministri theksoi se përgjegjësia është direkte tek dy figurat kryesore të qeverisë:
“Unaza e Madhe është vjedhja e madhe Rama–Balluku. Kjo është skemë e tyre.”
Berisha akuzoi Ramën se ka krijuar një sistem ku ministrat që nuk pranojnë të firmosin tenderë të dyshimtë largohen nga detyra:
“Pyesni Ahmetajn dhe Gjiknurin kur u thoshte Rama: ‘Belinda m’i zgjidh mua problemet’. Prandaj ata u hoqën.”
Akuza për presion ndaj gjykatave
Kreu i PD-së u ndal edhe te çështja Balluku, duke thënë se kryeministri po ushtron presion ndaj Gjykatës Kushtetuese për të mbrojtur ministren dhe aferat financiare për të cilat ajo akuzohet:
“Është e papranueshme që kryeministri i një vendi të shkojë në Kushtetuese për të mbrojtur një aferë qindra-milionëshe. Duhet të ishte dorëhequr me kohë.”
Ai kërkoi dorëheqjen e menjëhershme të Ramës, ndërsa Ballukun e cilësoi “bashkëautore” të abuzimeve.
Mesazhi politik i Berishës
Deklarata e tij shënon një tjetër përplasje të fortë politike në një periudhë ku qeveria po përballet me tronditje të mëdha nga hetimet e SPAK dhe vendimet e GJKKO.
