Komisioni Europian deklaroi se kompanitë ajrore nuk mund t’u vendosin pasagjerëve tarifa shtesë për fluturimet e blera në territorin e BE-së, edhe në rast të rritjes së çmimeve të karburantit si pasojë e krizës në Lindjen e Mesme.
Në një udhëzim të publikuar për sektorin e transportit ajror, Komisioni Europian sqaroi se çmimi final i biletës duhet të jetë i plotë dhe transparent që në momentin e blerjes.
“Kushdo që shet bileta avioni duhet të shfaqë gjithmonë çmimin përfundimtar që do të paguajë pasagjeri. Kjo përfshin të gjitha taksat, tarifat dhe kostot e parashikueshme”, deklaroi një zëdhënës i Komisionit.
Reagimi vjen pasi kompania ajrore Volotea vendosi tarifa shtesë deri në 14 euro për shkak të rritjes së çmimit të vajgurit, duke argumentuar se po zbatonte një politikë të quajtur “Premtim për Udhëtim të Drejtë”.
Sipas Komisionit Europian, një praktikë e tillë nuk justifikohet pasi bileta është blerë tashmë nga pasagjeri.
Ndërkohë, organizata spanjolle për mbrojtjen e konsumatorëve FACUA kërkoi hetim ndaj kompanisë, duke paralajmëruar se praktika mund të ndiqet edhe nga linja të tjera ajrore.
Komisioni Europian theksoi gjithashtu se pasagjerët e prekur nga anulimet e fluturimeve vazhdojnë të mbrohen nga rregullat europiane për të drejtat e udhëtarëve ajrorë. Kjo përfshin:
- rimbursimin e biletës,
- ridrejtimin e udhëtimit,
- ose kompensim në raste të caktuara.
Sipas BE-së, vetëm mungesa reale e karburantit mund të konsiderohet “rrethanë e jashtëzakonshme” që përjashton kompanitë nga kompensimi financiar, ndërsa rritja e çmimeve të karburantit nuk hyn në këtë kategori.
Kriza në Lindjen e Mesme dhe tensionet në Ngushtica e Hormuzit kanë ndikuar ndjeshëm në tregun global të naftës, duke bërë që kostot e karburantit për avionë të rriten ndjeshëm muajt e fundit.
Për shkak të situatës, disa kompani europiane si Lufthansa, British Airways dhe KLM kanë anuluar fluturime, duke argumentuar se disa linja janë bërë ekonomikisht të paqëndrueshme.
