Kreu i Grupit Parlamentar të Partisë Demokratike, Gazment Bardhi, deklaroi se sipas tij Belinda Balluku rrezikon deri në 35 vite burg, pas shtimit të fakteve të reja në dosjen e SPAK.
I ftuar në një studio televizive, Bardhi tha se në materialet hetimore Balluku paraqitet si urdhëruese e paracaktimit të tenderave dhe në disa raste si zbatuese e urdhrave që, sipas tij, kanë ardhur nga kryeministri Edi Rama.
Ai përmendi dy procedura që, sipas pretendimeve të tij, janë pjesë e hetimit: njëra që lidhet me supervizimin e mirëmbajtjes së rrugëve të veriut dhe tjetra me tenderin për rrugën e Porto Romanos, me vlerë rreth 15 milionë euro.
Bardhi theksoi se përgjimet dhe materialet e dosjes, sipas tij, përmbajnë referenca për ndërhyrje në proceset e prokurimit, ndërsa çështja mbetet në hetim nga Prokuroria e Posaçme.
