Protestat kundër projektit turistik që po ndërtohet në zonën e Rrjollit kanë vijuar edhe këtë fundjavë, ndërsa banorët e zonës kanë shprehur sërish kundërshtimin e tyre ndaj punimeve që po zhvillohen në territorin ku ata pretendojnë të drejta pronësie.
Të mbledhur pranë kantierit të ndërtimit, protestuesit kanë deklaruar se nuk janë kundër zhvillimit ekonomik apo investimeve, por kundër mënyrës se si, sipas tyre, janë trajtuar çështjet e pronësisë dhe interesat e komunitetit lokal.
Një prej banorëve pjesëmarrës në protestë u shpreh se qëllimi i tyre është të kërkojnë zgjidhje ligjore dhe respektimin e të drejtave të tyre, duke theksuar se nuk synojnë përplasje me institucionet apo forcat e rendit.
“Kërkojmë të drejtën tonë. Është hera e disatë që protestojmë. Nuk duam konflikt dhe as përplasje me askënd. Kërkojmë që shteti të dëgjojë shqetësimet tona dhe të mos na rëndojë më tej situatën,” deklaroi ai.
Sipas protestuesve, zona e kantierit është rrethuar me mure dhe masa të forta sigurie, gjë që ka shtuar pakënaqësitë mes banorëve. Ata pretendojnë se kufizimi i aksesit në territor ka krijuar tensione të reja dhe ka forcuar bindjen e tyre për të vijuar protestat.
Banorët kanë paralajmëruar se do të vazhdojnë mobilizimin në ditët në vijim, duke kërkuar transparencë mbi projektin, sqarimin e statusit të pronave dhe dialog me institucionet përgjegjëse.
Nga ana tjetër, mbështetësit e projektit argumentojnë se investimi pritet të sjellë zhvillim ekonomik, vende të reja pune dhe rritje të potencialit turistik të zonës.
Debati mbi zhvillimin e Rrjollit është kthyer në një nga çështjet më të diskutuara të muajve të fundit, duke vënë përballë interesat e zhvillimit ekonomik me pretendimet e banorëve për pronësinë dhe mbrojtjen e territorit. Ndërsa palët mbeten në pozicione të kundërta, situata pritet të vijojë të ndiqet nga afër edhe nga institucionet përgjegjëse.
