Sot në Apelin e Gjykatës së Posaçme Kundër Korrupsionit dhe Krimit të Organizuar (GJKKO) zhvillohet seanca gjyqësore për shqyrtimin e ankimit të zv/kryeministres Belinda Balluku, e cila kërkon heqjen e masave të sigurisë të vendosura ndaj saj.
Balluku ka ankimuar vendimin e GJKKO-së që parashikon pezullimin nga detyra dhe ndalimin e daljes jashtë shtetit, masa të vendosura në kuadër të hetimeve për aferën e Tunelit të Llogarasë dhe procedurat e prokurimit për Unazën e Madhe të Tiranës. Seanca do të shqyrtohet nga gjyqtarja Miliana Muça.
Akuzat ndaj Ballukut
Prokuroria e Posaçme (SPAK) ka marrë të pandehur Belinda Ballukun për veprën penale “Shkelja e barazisë së pjesëmarrësve në tendera apo ankande publike”, e kryer në bashkëpunim, lidhur me procedurën e prokurimit për ndërtimin e Tunelit të Llogarasë, një projekt me vlerë rreth 210 milionë euro.
Gjithashtu, ajo është nën hetim edhe për shtatë procedura të tjera prokurimi që lidhen me ndërtimin e segmenteve të Unazës së Madhe të Tiranës, ku fondet e prokuruara arrijnë në rreth 450 milionë euro.
SPAK kërkon arrestimin
Ndërkohë, Prokuroria e Posaçme i ka kërkuar Kuvendit të Shqipërisë heqjen e imunitetit parlamentar të Ballukut, me qëllim arrestimin e saj. SPAK argumenton se ekzistojnë dyshime të forta për ndërhyrje të drejtpërdrejtë të zv/kryeministres në orientimin dhe paracaktimin e fituesve të tenderëve.
Sipas njoftimit zyrtar, Balluku dyshohet se ka ndjekur dhe orientuar procedurat e prokurimit që nga faza përgatitore deri në lidhjen e kontratave, duke krijuar avantazhe të padrejta për operatorë të caktuar ekonomikë.
Të përfshirë edhe zyrtarë të tjerë
Për të njëjtën çështje kanë kërkuar zbutje ose heqje të masave të sigurisë edhe:
- Erald Elezi, drejtor i KESH, aktualisht në arrest shtëpie
- Gentian Gjyli, kreu i ARRSH
Sipas SPAK, në bashkëpunim me Ballukun, zyrtarë të ARRSH dhe Ministrisë së Infrastrukturës kanë paracaktuar fituesit e tenderëve, duke shkelur parimet e konkurrencës dhe barazisë në prokurimet publike.
Përgjime dhe komunikime
Hetimi është shoqëruar edhe me komunikime të përgjuara, të cilat sipas SPAK dhe materialeve të publikuara së fundmi nga opozita, tregojnë ndërhyrje direkte në proceset e tenderimit dhe vendimmarrje jashtë procedurave ligjore.
Vendimi i Apelit të GJKKO-së pritet të jetë përcaktues për vijimin e mëtejshëm të çështjes dhe për fatin penal të një prej figurave më të larta të qeverisë.
