Autoritetet kanë zbuluar një arsenal armësh në banesën e Dhimitër Meçit, të njohur me nofkën “Dhimos”, i cili konsiderohet një nga vrasësit me pagesë më të rrezikshëm në rajon dhe një hallkë kyçe në të ashtuquajturën Mafia Greke. Zbulimi është bërë në një fshat të Shqipërisë, ku u sekuestruan armë zjarri, plumba dhe karikatorë të gatshëm për përdorim.
Sipas burimeve hetimore, 45-vjeçari ka një histori të gjatë kriminale, me akuza të mëparshme për vrasje dhe atentate. Hetuesit e përshkruajnë atë si një person “jashtëzakonisht mizor dhe tepër të rrezikshëm”.
Si u organizua atentati i dështuar ndaj Giannis Lalas
Sipas dosjes së autoriteteve greke, “Dhimos” dyshohet të ketë qenë ekzekutori kryesor në atentatin ndaj mafiozit grek Giannis Lalas, në maj të vitit 2025. Ai dyshohet se ka qëlluar dhjetëra herë nga një motoçikletë drejt një Mercedes-i të blinduar, ku ndodhej Lalas.
Blindimi i makinës rezultoi vendimtar, duke i shpëtuar jetën objektivit të atentatit.
Përveç Dhimos, në këtë çështje janë arrestuar edhe tre shqiptarë të tjerë dhe dy shtetas grekë, të cilët akuzohen si pjesë e grupit të strukturuar kriminal që kishte marrë porosinë për eliminimin e Lalas.
Makina e atentatit dhe zjarrvënia e karburantit
Hetimet zbuluan se grupi kriminal kishte përdorur një Toyota Yaris të bardhë, e cila u gjet më vonë nga policia dhe u identifikua si mjeti ndihmës i atentatorëve.
Përveç tentativës për vrasjen e Lalasit, katër prej të dyshuarve rezultojnë të përfshirë edhe në zjarrvënien e një pike karburanti në Argyroupoli më 23 shkurt 2025. Sipas policisë:
- autorët mbërritën me dy motoçikleta,
- njëri prej tyre mbante një kallashnikov,
- ata hodhën lëndë djegëse nga një bidon,
- dhe u larguan me shpejtësi nga vendngjarja.
Ky episod, sipas hetuesve, lidhet me aktivitetet zhvatëse dhe presionin kriminal që grupi ushtronte në zonë.
Hetimet vazhdojnë
Autoritetet greke dhe ato shqiptare po bashkëpunojnë ngushtë për të zbardhur rrjetin e plotë kriminal, linjat e financimit dhe lidhjet ndërkombëtare të Dhimos dhe bashkëpunëtorëve të tij.
