Një stuhi dimërore jashtëzakonisht e fuqishme ka goditur Shtetet e Bashkuara të Amerikës, duke shkaktuar të paktën 14 viktima dhe kaos në disa shtete. Temperaturat ekstreme, që në disa zona kanë zbritur deri në -45°C, kanë paralizuar jetën e përditshme dhe kanë sjellë pasoja të rënda për infrastrukturën.
Më shumë se një milion familje kanë mbetur pa energji elektrike, ndërsa mijëra fluturime janë anuluar për shkak të kushteve të rrezikshme atmosferike. Ndër shtetet më të goditura janë Teksasi, Luiziana, Misisipi dhe Xhorxhia, ndërsa në veri dhe verilindje, qytete si Nju Jorku dhe Filadelfia janë përfshirë nga reshje të dendura dëbore dhe ngrica ekstreme.
Autoritetet amerikane kanë shpallur gjendje të jashtëzakonshme në disa zona dhe u kanë bërë thirrje qytetarëve të shmangin udhëtimet, të qëndrojnë në ambiente të ngrohta dhe të marrin masa mbrojtëse ndaj temperaturave potencialisht vdekjeprurëse.
Meteorologët bëjnë me dije se stuhia ka shkaktuar edhe një deformim të vorbullës polare, duke lejuar përhapjen e masave të ajrit arktik drejt jugut të SHBA-së. Ky fenomen ka rritur shqetësimet për ndikimin e ndryshimeve klimatike dhe intensifikimin e ngjarjeve ekstreme të motit.
Ende nuk dihet se sa do të zgjasë kjo situatë e rëndë, ndërsa ekipet e emergjencës vijojnë punën për të rikthyer energjinë elektrike dhe për të ndihmuar zonat më të prekura.
