Rinovimi i politikës pas shtatorit 2025 nuk solli vetëm fytyra të reja në Kuvend, por edhe pasuri që arrijnë shifra marramendëse. Deklarimet zyrtare tregojnë se një pjesë e deputetëve të rinj, si nga mazhoranca ashtu edhe nga opozita, hyjnë në politikë me apartamente luksoze, vila, investime dhe llogari bankare me miliona euro.
Në krye të listës renditet ministrja e Shëndetësisë, Evis Sala, me një pasuri neto mbi 5.3 milionë euro, e përbërë nga fonde investimi, llogari pensioni në valutë të huaj dhe investime jashtë vendit, krahas pasurive të paluajtshme në Shqipëri.
Ndër më të pasurit është edhe deputeti demokrat Gjin Gjoni, me dy vila me vlerë rreth 1.3 milionë euro, si dhe dhjetëra hua të dhëna prej tij dhe bashkëshortes, që arrijnë në qindra mijëra euro.
Ana Dajko, deputete e re, deklaron mbi 1.19 milionë euro pasuri, kryesisht nga aksione dhe depozita bankare.
Në një nivel më të ulët, por ende larg mesatares shqiptare, qëndron Redi Muçi, me rreth 162 mijë euro, dy apartamente dhe kursime bankare.
Deputetja socialiste Sara Mila deklaron pasuri modeste personale, por së bashku me partnerin familjar arrin mbi 1.1 milionë euro, me prona dhe aksione biznesi.
Emra të tjerë si Admir Kadeli dhe Xhenis Çela shfaqen me pasuri mbi 100 mijë euro, ndërsa deputetja më e re e PS-së, Zegjine Çaushi, rezulton me profilin më të thjeshtë financiar, rreth 20 mijë euro kursime.
Panorama e përgjithshme tregon se ndërrimi i brezave në politikë nuk ka sjellë domosdoshmërisht ndryshim në realitetin ekonomik: milionat mbeten të pranishme, pavarësisht emrave të rinj në skenën politike.
