Deklaratat e presidentit amerikan Donald Trump pas vizitës së tij në Kinë kanë shkaktuar shqetësim në Tajvan, duke ngritur pikëpyetje mbi angazhimin e ardhshëm të Shtetet e Bashkuara të Amerikës për mbrojtjen e ishullit.
Sipas një analize të Deutsche Welle, autoritetet tajvaneze reaguan menjëherë pas deklaratave të Trump, sidomos lidhur me mundësinë e pezullimit ose përdorimit të furnizimeve ushtarake si mjet negociues me Pekinin.
Zëvendësministri i Jashtëm i Tajvanit, Chen Ming-chi, deklaroi se shitjet amerikane të armëve për Tajvanin mbeten një element kyç për ruajtjen e paqes dhe stabilitetit në rajon. Ai iu referua ligjit amerikan “Taiwan Relations Act” të vitit 1979, i cili parashikon mbështetje ushtarake mbrojtëse për ishullin.
Në një intervistë për Fox News, Trump la të kuptohet se dërgesat e armëve mund të përdoren si instrument negociues në raportet me Kinën.
“Mund ta bëjmë, mund edhe të mos e bëjmë”, tha ai, duke shtuar se çështja “varet nga Kina”.
Në Tajvan ka shkaktuar reagime edhe fakti që Trump përsëriti disa qëndrime të ngjashme me ato të udhëheqjes kineze, duke paralajmëruar Tajvanin të mos shpallë zyrtarisht pavarësinë.
“Nuk duam që dikush të thotë: le të shpallim pavarësinë, sepse SHBA qëndron pas nesh”, deklaroi presidenti amerikan.
Administrata Trump kishte miratuar më herët një paketë armatimi prej 11 miliardë dollarësh për Tajvanin, ndërsa një paketë e dytë me vlerë rreth 14 miliardë dollarë raportohet se ende pret miratimin përfundimtar.
Kina vazhdon ta konsiderojë Tajvanin pjesë të territorit të saj dhe nuk e ka përjashtuar përdorimin e forcës ushtarake për ta marrë nën kontroll ishullin. Vitet e fundit, Pekini ka shtuar ndjeshëm praninë ushtarake pranë Tajvanit përmes manovrave detare dhe fluturimeve të avionëve luftarakë.
Tajvani, i cili është vetëqeverisës që prej vitit 1949, nuk ka qenë kurrë pjesë e Republikës Popullore të Kinës, por mbetet një nga pikat më të tensionuara në marrëdhëniet mes Uashingtonit dhe Pekinit.
