Shtetet e Bashkuara të Amerikës vijojnë të japin mesazhe të qarta dhe të forta për angazhimin e tyre në mbështetje të Shqipërisë dhe institucioneve ligjzbatuese në luftën kundër korrupsionit dhe krimit të organizuar. Ambasada amerikane në Tiranë, ka reaguar dje në rrjetet sociale, teksa u ka treguar “muskujt” të “paprekshmëve” dhe armiqve të reformës në drejtësi, duke ua bërë të qartë se FBI është krah Prokurorisë së Posaçme (SPAK) për të goditur korrupsionin dhe krimi e organizuar.
Ndër të tjera, ambasada njofton se prokurorët specialë i janë nënshtruar një trajnimi nga OPDAT dhe FBI, ndërsa e bën të qartë se SHBA do të mbështesë SPAK në arrestimin e të korruptuarve. “Fundjavën e kaluar OPDAT zhvilloi një seminar koordinues për prokurorët e SPAK në Peshkopi. Së bashku me përfaqësues nga OPDAT, ICITAP dhe FBI, prokurorët e SPAK u takuan për të diskutuar mbi përparësitë kryesore të SPAK. Shtetet e Bashkuara vazhdojnë të qëndrojnë me vendosmëri pranë institucioneve të pavarura të Shqipërisë në luftën e tyre kundër korrupsionit dhe krimit të organizuar”, shkoi dje ambasada e SHBA në Tiranë, pak minuta para se të niste protesta e thirrur nga opozita.
Mesazhi
Por duke mobilizuar burime të rëndësishme si FBI, amerikanët po tregojnë “muskujt” e tyre për të ndihmuar institucionet shqiptare në përpjekjet për reformimin e drejtësisë. Ky bashkëpunim shënon një hap të rëndësishëm në përpjekjet për të goditur ato që konsiderohen si “të paprekshëm” dhe për të ndëshkuar armiqtë e reformës. Kjo është një mundësi për të forcuar besimin e qytetarëve shqiptarë në institucionet e shtetit dhe për të krijuar një klimë më të sigurt dhe transparente.
Në një kohë kur sfidat e korrupsionit dhe krimit të organizuar janë të pranishme në vendin tonë, angazhimi i SHBA tregon se bashkëpunimi ndërkombëtar është çelësi për një të ardhme më të ndritur. Shqipëria, me mbështetje të fortë nga partnerët e saj, veçanërisht nga Shtetet e Bashkuara të Amerikës, por edhe nga Bashkimi Evropian dhe Britania e Madhe ka potencialin për të përmbushur aspiratat e saj europiane dhe për të ndërtuar një shoqëri më të drejtë dhe të barabartë.
Ambasada e SHBA reagon për protestën e opozitës
Ndërkohë më herët gjatë paradites së djeshme ambasada e SHBA në Shqipëri, reagoi në rrjetet sociale për protestën e opozitës. Në reagimin e saj ra në sy fakti se nuk thuhej protestë, por demonstratë. Ajo u kërkoi qytetarëve të saj të bëjnë kujdes. “Ngjarja: Të hënën më 7 tetor është planifikuar të zhvillohet një demonstratë. Protestuesit planifikojnë të mblidhen te Kryeministria. në orën 18:00.
Pritet prania e shtuar e policisë, mbyllja e rrugëve dhe ndërprerja e qarkullimit. Policia e Shtetit Shqiptar ka këshilluar se protestuesit mund të bllokojnë kryqëzimet në pjesë të ndryshme të qytetit të Tiranës. Personeli i ambasadës amerikane është këshilluar të shmangë demonstratën. Monitoroni mediat lokale dhe ndiqni udhëzimet e autoriteteve lokale të zbatimit të ligjit për informacionin më të fundit. Veprimet për të ndërmarrë: Qytetarët amerikanë këshillohen të shmangin këtë ngjarje. Monitoroni mediat lokale. Jini të vetëdijshëm për rrethinën tuaj. Mbani një profil të ulët”, nënvizoi ambasada amerikane në Tiranë.
