Deputetja e Partia Demokratike e Shqipërisë, Albana Vokshi, ka kritikuar ashpër mazhorancën gjatë seancës plenare, duke ngritur shqetësimin për mungesën e ministrave në Kuvend.
Sipas saj, gjatë diskutimeve për problematikat e ngritura nga deputetët pas javës së gjelbër, në sallë nuk ishte i pranishëm asnjë përfaqësues i qeverisë për të dëgjuar shqetësimet e qytetarëve.
“Ku janë ministrat? Kush i dëgjon sot gjithë problematikat e ngritura?” u shpreh Vokshi, duke theksuar se ankesa ka pasur jo vetëm nga opozita, por edhe nga deputetë të mazhorancës.
Ajo u ndal veçanërisht te situata në sistemin shëndetësor, duke deklaruar se spitalet përballen me mungesë pajisjesh, stafesh mjekësore dhe përdorim të barnave të skaduara.
Deputetja e opozitës akuzoi qeverinë për neglizhencë dhe kërkoi angazhim konkret nga institucionet përgjegjëse.
“Lërini lotët e krokodilit dhe dilni punoni atje ku duhet,” përfundoi ajo.
Deklaratat e Vokshit vijnë në një klimë të tensionuar politike, ku debatet në Kuvend vijojnë të dominohen nga akuzat për menaxhimin e shërbimeve publike dhe përgjegjësinë e qeverisë ndaj qytetarëve.
