Paralajmërimi i fundit i Ambasada e Shteteve të Bashkuara në Tiranë për rrezikun e mundshëm nga sulme të lidhura me Iranin ka shkaktuar reagime të forta në politikën shqiptare, duke rikthyer në vëmendje çështjen e sigurisë kombëtare.
Sipas njoftimit, grupe të lidhura me Iranin mund të shënjestrojnë interesa amerikane, opozitën iraniane të strehuar në Shqipëri, si dhe ambiente publike si qendra tregtare, bare dhe restorante.
Në këtë kontekst, kreu i Partisë Republikane, Fatmir Mediu, reagoi ashpër duke e cilësuar situatën si një dështim të institucioneve shqiptare.
“Reagimi im i parë është: kemi shtetarë, po s’kemi shtet,” u shpreh ai, duke kritikuar mungesën e reagimit nga institucionet kryesore si Presidenca dhe Qeveria.
Mediu theksoi se Shqipëria është një objektiv i mundshëm për Iranin për disa arsye kyçe: strehimi i opozitës iraniane (MEK), ndërprerja e marrëdhënieve diplomatike me Teheranin pas sulmeve kibernetike të vitit 2022 dhe tensionet e vazhdueshme politike mes dy vendeve.
Ai bëri thirrje për mbledhjen urgjente të Këshillit të Sigurisë Kombëtare, duke e cilësuar atë si një institucion “pothuajse inekzistent”.
Sipas tij, kërcënimi nuk lidhet vetëm me sulme ushtarake, por sidomos me veprime të fshehta destabilizuese, që mund të godasin infrastrukturën kritike, institucionet apo figura të rëndësishme në vend.
“Siguria kombëtare nuk është poezi, është veprim konkret dhe organizim real,” theksoi Mediu, duke shtuar se Shqipëria duhet të bashkëpunojë ngushtë me NATO dhe partnerët ndërkombëtarë për të garantuar mbrojtjen.
Deklaratat e tij vijnë në një moment kur tensionet në Lindjen e Mesme janë në rritje, ndërsa Shqipëria, si vend anëtar i NATO-s dhe pritëse e opozitës iraniane, konsiderohet potencialisht në rrezik nga veprime hakmarrëse apo subversive.
Debati mbi sigurinë kombëtare pritet të intensifikohet në ditët në vijim, ndërsa opinioni publik kërkon më shumë transparencë dhe masa konkrete nga institucionet shqiptare.
