Autoritetet në Emiratet e Bashkuara Arabe kanë ngritur nivelin e gatishmërisë për shkak të stuhive të forta dhe kushteve të rrezikshme atmosferike që pritet të godasin vendin në orët dhe ditët në vijim. Policia e Dubait u ka bërë thirrje qytetarëve dhe banorëve të huaj të shmangin udhëtimet e panevojshme dhe të qëndrojnë në shtëpi për sigurinë e tyre.
Thirrja urgjente u dërgua të martën përmes mesazheve në telefonat celularë, ku autoritetet paralajmëruan për mot të paqëndrueshëm dhe potencialisht të rrezikshëm.
“Për sigurinë tuaj, ju lutemi të jeni të kujdesshëm pasi priten kushte të paqëndrueshme të motit në orët në vijim. Shmangni daljen jashtë përveç nëse është absolutisht e nevojshme deri në mesditën e së premtes,” thuhet në mesazhin zyrtar të Policisë së Dubait.
Paralajmërimi vjen vetëm disa orë pasi reshjet e rrëmbyeshme të shiut shkaktuan përmbytje në disa rrugë të Dubait, duke vështirësuar qarkullimin dhe duke krijuar situata të rrezikshme për drejtuesit e automjeteve dhe këmbësorët. Pamjet e publikuara në rrjetet sociale tregojnë rrugë të mbuluara nga uji dhe makina të bllokuara.
Sipas Qendrës Kombëtare për Meteorologjinë (NCM), reshje shiu priten në të gjithë territorin e Emirateve, përfshirë Dubain dhe Abu Dhabin, të shoqëruara me erëra të forta dhe stuhi lokale, të cilat mund të përkeqësojnë situatën si në zonat urbane ashtu edhe në ato rurale.
Reshje të dendura shiu janë regjistruar gjithashtu në vende të tjera të Gjirit, si Arabia Saudite dhe Katari, duke treguar se sistemi i motit të paqëndrueshëm po prek një rajon më të gjerë të Lindjes së Mesme.
Paralajmërimet aktuale vijnë në një kontekst veçanërisht të ndjeshëm, pas reshjeve rekord të prillit 2024, kur Emiratet u përballën me përmbytje masive. Në atë periudhë, rrugët u kthyen në lumenj, Aeroporti Ndërkombëtar i Dubait u paralizua për orë të tëra dhe të paktën katër persona humbën jetën.
Autoritetet u bëjnë thirrje banorëve të ndjekin vetëm njoftimet zyrtare, të shmangin zonat e rrezikuara dhe të tregojnë kujdes maksimal, ndërsa shërbimet e emergjencës janë vendosur në gatishmëri të plotë për çdo situatë të mundshme.
