Një operacion i bujshëm antidrogë-financiar në zemër të Tiranës ka nxjerrë në pah një skemë të sofistikuar mashtrimi dhe dekonspirimi. Hetuesit që ndërhynë në një nga kullat më të njohura të kryeqytetit u përballën me një pamje tronditëse: ambienti i call center-it ishte boshatisur totalisht. Asnjë kompjuter, asnjë server, asnjë gjurmë aktiviteti.
Në fillim u duk si një dështim. Por shumë shpejt, operacioni mori një kthesë të fortë. Përmes analizës së kamerave të sigurisë dhe gjurmimit teknik, u zbulua se pajisjet ishin zhvendosur me automjete drejt një tjetër kulle në Tiranë. Targat u identifikuan dhe një nga drejtuesit e mjeteve u ndalua, duke pranuar se kishte marrë pjesë në transportimin e pajisjeve.
Ndërhyrja e dytë zbuloi të vërtetën e plotë: serverë aktivë, pajisje elektronike dhe portofole kriptomonedhash, ku dyshohet se qarkullonin 10–12 milionë euro në muaj, ndërsa në periudha të caktuara shuma arrinte deri në 30 milionë euro.
Në momentet e fundit të operacionit, disa punonjës tentuan të shkatërrojnë dhe zhdukin prova, duke hedhur materiale në kosha plehrash, por pa ia dalë. Bilanci i deritanishëm: 8 persona të arrestuar, shumica në burg, ndërsa organizatorët kryesorë janë në arrati.
Skema mashtruese funksiononte duke joshur qytetarë europianë me investime të rreme në kriptomonedha. Fillimisht u kërkoheshin shuma të vogla, por më pas viktimat bindeshin të transferonin qindra mijëra, madje edhe mbi 1 milion euro, para se komunikimi të ndërpritej dhe paratë të zhdukeshin.
Ky operacion ka zbuluar se call center-at mashtrues janë kthyer në industri kriminale, me kapacitet të lartë fitimi dhe me aftësi për të zhdukur gjurmët brenda orëve. Një alarm i fortë për autoritetet dhe një sinjal se lufta ndaj këtij fenomeni sapo ka hyrë në fazën më të ashpër.
