Gjykata e Posaçme Kundër Korrupsionit dhe Krimit të Organizuar (GJKKO) ka vendosur ndryshimin e masës së sigurisë për ish-ministrin e Shëndetësisë, Ilir Beqaj, duke zëvendësuar masën “arrest në burg” me “arrest në shtëpi”.
Vendimi u mor pas shqyrtimit të kërkesës së paraqitur nga mbrojtja e Beqajt, e cila argumentoi se ishin tejkaluar afatet maksimale të paraburgimit, duke iu referuar një vendimi të Gjykatës së Lartë mbi llogaritjen e këtyre afateve.
Ilir Beqaj ndodhej në masën e sigurisë “arrest në burg” në kuadër të hetimeve për dosjen “SASPAC”. Me vendimin e ri të gjykatës, ai do të vijojë të qëndrojë nën masën e sigurisë “arrest në shtëpi”.
Vendimi për masën e sigurisë nuk përbën gjykim mbi themelin e çështjes penale, ndërsa procedurat hetimore dhe gjyqësore lidhur me dosjen vijojnë.
Sqarim: Procedurat penale janë në vijim. Ndryshimi i masës së sigurisë nuk paragjykon fajësinë ose pafajësinë e të pandehurit. Përgjegjësia penale do të përcaktohet nga gjykata me një vendim të formës së prerë, ndërsa Ilir Beqaj prezumohet i pafajshëm deri në provimin e fajësisë sipas ligjit.
