Gjykata e Posaçme Kundër Korrupsionit dhe Krimit të Organizuar (GJKKO) shtyu seancën gjyqësore në procesin ndaj kryebashkiakut të Tiranës, Erion Veliaj, pasi avokati i tij mbrojtës, Plarent Ndreca, nuk ishte i pranishëm në seancë.
Sipas njoftimit të paraqitur në gjykatë, Ndreca kishte bërë me dije se ndodhej në një proces tjetër gjyqësor në Gjykatën e Tiranës. Prokurori i Posaçëm Ols Dado kërkoi shtyrjen e seancës, caktimin e një avokati kryesisht për të garantuar vijimin e procesit, gjobitjen e avokatit për mungesën dhe pezullimin e afateve të paraburgimit.
Gjykata pranoi kërkesat e prokurorisë, vendosi gjobitjen e avokatit Plarent Ndreca me 50 mijë lekë për mungesë të pajustifikuar dhe caktoi avokaten Valentina Teodoresku si mbrojtëse kryesisht për Erion Veliajn, krahas avokatit të zgjedhur.
Në të njëjtën seancë mungoi edhe Ajola Xoxa. Avokati i saj, Gurali Braimllari, paraqiti dokumentacion mjekësor, duke argumentuar se gjendja shëndetësore e klientes nuk i lejonte pjesëmarrjen në gjykim. Prokuroria kundërshtoi këtë pretendim, ndërsa gjykata vlerësoi se dokumentacioni i paraqitur nuk përbënte shkak ligjor për mosparaqitjen e saj.
Seanca e radhës u caktua për datën 15 shtator. Gjykata vendosi gjithashtu pezullimin e afateve të paraburgimit për Erion Veliajn.
Po ashtu, gjatë së njëjtës ditë, Gjykata e Lartë rrëzoi kërkesën e Erion Veliajt për kundërshtimin e vendimeve të mëparshme lidhur me pezullimin e afateve të paraburgimit. Mbrojtja e tij ka argumentuar se këto vendime janë në kundërshtim me Kushtetutën, ndërsa gjykata ka lënë në fuqi vendimet e mëparshme.
Sqarim: Procedurat gjyqësore janë në vijim. Pretendimet e paraqitura nga palët do të vlerësohen nga organet kompetente, ndërsa personat e përfshirë prezumohen të pafajshëm deri në një vendim gjyqësor të formës së prerë.
