Këshilli i Lartë Gjyqësor (KLGJ) ka vendosur të rrëzojë kërkesën e Pamela Qirkos për t’u emëruar gjyqtare në Gjykatën e Apelit të Juridiksionit të Përgjithshëm.
Qirko, e cila ka ushtruar detyrën në institucionet e procesit të rivlerësimit kalimtar (vetingut), ishte pjesë e listës së 10 juristëve që kishin aplikuar për t’u përfshirë në trupën gjyqësore të Apelit pas përfundimit të mandateve të tyre kushtetuese.
Vendimi u mor gjatë mbledhjes plenare të zhvilluar këtë të premte, ku KLGJ vendosi të mos miratojë asnjërën prej kërkesave të paraqitura nga kandidatët.
Përveç Pamela Qirkos, Këshilli rrëzoi edhe kërkesat e:
- Suela Zhegut;
- Firdes Shulit;
- Alma Faskajt;
- Brunilda Bekteshit;
- Olsi Komicit;
- Valbona Sanxhaktarit;
- Xhensila Pines;
- Etleda Çiftjas;
- Roland Ilisë.
Gjatë të njëjtës mbledhje, KLGJ miratoi raportin e vlerësimit etik dhe profesional për gjyqtaren Brunilda Kadi për vitin 2024, ndërsa shtyu shqyrtimin e vlerësimit për gjyqtarin Adrian Shega.
Këshilli vendosi gjithashtu zgjatjen e afatit të delegimit të gjyqtarit Sokol Ibi dhe ricaktimin e tij në Gjykatën Administrative të Apelit.
Në rendin e ditës u përfshinë edhe çështje të tjera procedurale, mes tyre caktimi me short i relatorit për procedimin disiplinor ndaj gjyqtares Suela Dashi, zëvendësimi i nëpunëses përgjegjëse për vlerësimin etik dhe profesional të gjyqtarëve, si dhe deklarimi i përfundimit pa vendim përfundimtar të procedurës së verifikimit të pasurisë dhe figurës për një kandidate në Shkollën e Magjistraturës.
Në përfundim të mbledhjes, KLGJ miratoi edhe procesverbalet e mbledhjeve të datave 29 prill dhe 6 maj 2026.
