Deputeti i Partisë Demokratike, Belind Këlliçi, ka akuzuar kryeministrin Edi Rama për mashtrim publik lidhur me mbrojtjen e Gjirit të Porto Palermos, duke publikuar dokumente që, sipas tij, dëshmojnë të kundërtën e deklaratave të kreut të qeverisë.
Përmes një reagimi në rrjetet sociale, Këlliçi pretendon se, ndërsa Rama deklaron se Porto Palermo është vendosur nën mbrojtje, vendimet e miratuara nga vetë qeveria lejojnë zhvillime brenda kësaj zone.
“Sot Edi Rama deklaroi se paska marrë në mbrojtje Porto Palermon. Por dokumentet zyrtare tregojnë krejt të kundërtën. Në rendin e ditës së Këshillit Kombëtar të Territorit dhe Ujit, më 25 shtator 2025, në pikën 60, është miratuar draft-vendimi për ndërtimin e një impianti fotovoltaik me kapacitet 2 MW në Porto Palermo, nga shoqëria ‘Sea Solar Energy’ sh.p.k.”, shkruan Këlliçi.
Sipas deputetit demokrat, ky vendim bie ndesh me statusin që qeveria i dha zonës në vitin 2022, kur Gjiri i Porto Palermos u shpall zonë me rëndësi kombëtare dhe pjesë e Parkut Natyror të mbrojtur.
Këlliçi akuzon qeverinë se po ndjek një politikë me standarde të dyfishta, duke folur publikisht për mbrojtjen e mjedisit, ndërsa në praktikë, sipas tij, miraton projekte zhvillimi në zona të mbrojtura.
“Harta e Shqipërisë është kthyer në tryezë interesash private”, shprehet ai, duke kërkuar transparencë të plotë mbi vendimmarrjen që prek pasuritë natyrore dhe vijën bregdetare të vendit.
