Iraku ka paralajmëruar se mund të rishqyrtojë anëtarësimin e tij në Organizatën e Vendeve Eksportuese të Naftës (OPEC), nëse organizata nuk rrit kuotën e prodhimit të naftës për vendin, raportoi Bloomberg duke cituar Ministrinë e Naftës së Irakut.
Zëdhënësi i ministrisë, Salim al-Rikabi, theksoi se Bagdadi nuk ka aktualisht synim të largohet nga OPEC dhe mbetet i angazhuar për të bashkëpunuar brenda mekanizmave të organizatës. Megjithatë, ai nënvizoi se Iraku synon të rrisë prodhimin e naftës në përputhje me kapacitetet dhe nevojat e tij ekonomike.
Sipas tij, OPEC duhet të rishikojë dhe të rrisë kuotën e prodhimit për Irakun. Në të kundërt, autoritetet irakiane do të detyrohen të vendosin nëse do të vazhdojnë të jenë pjesë e organizatës apo do të tërhiqen prej saj.
Deklaratat vijnë në një periudhë kur eksportet e naftës së Irakut janë kufizuar ndjeshëm për shkak të konfliktit në rajon, duke shtuar presionin mbi qeverinë për të rritur prodhimin dhe të ardhurat nga sektori energjetik.
Ndërkohë, OPEC po përballet me sfida të reja pas largimit të Emirateve të Bashkuara Arabe nga organizata, pas mosmarrëveshjeve të gjata me Arabinë Saudite lidhur me kufizimet e prodhimit.
Në të njëjtën kohë, OPEC dhe aleatët e tij kanë nisur një proces rishikimi të kapaciteteve teknike të prodhimit për secilin vend anëtar. Ky proces pritet të përfundojë më vonë gjatë këtij viti dhe rezultatet do të shërbejnë si bazë për përcaktimin e objektivave të prodhimit për vitin 2027.
