Qytetarët do të mblidhen sërish këtë pasdite në Tiranë në protestën e 14-të radhazi kundër qeverisë, duke vijuar kërkesat për dorëheqjen e kryeministrit Edi Rama dhe ndryshime politike në vend.
Pas pjesëmarrjes së lartë të raportuar në protestën e një dite më parë, organizatorët kanë njoftuar se tubimi i radhës do të zhvillohet sot në orën 18:00. Fillimisht protestuesit pritet të grumbullohen në sheshin “Skënderbej”, ndërsa më pas do të marshojnë drejt godinës së Kryeministrisë.
Me moton “Bashkë për ndryshim”, organizatorët u kanë bërë thirrje qytetarëve nga e gjithë Shqipëria, por edhe emigrantëve që ndodhen jashtë vendit, që t’i bashkohen protestës dhe të shprehin pakënaqësitë e tyre ndaj qeverisjes.
Protestat, të cilat fillimisht nisën si reagim ndaj projekteve të diskutueshme të zhvillimit në bregdet, janë shndërruar gradualisht në një lëvizje më të gjerë qytetare me kërkesa politike dhe sociale.
Gjatë ditëve të fundit, në tubime janë dëgjuar vazhdimisht thirrje si “Rama jep dorëheqjen”, “Shqipëri e re”, “Revolucion” dhe slogane të tjera që kërkojnë ndryshim politik.
Organizatorët kanë deklaruar se protestat do të vazhdojnë në mënyrë të përditshme deri në realizimin e kërkesave të tyre, ndërsa kanë bërë apel për pjesëmarrje sa më të gjerë dhe zhvillim paqësor të tubimeve.
Mbetet për t’u parë se sa do të jetë pjesëmarrja në protestën e sotme dhe si do të reagojnë institucionet përballë vazhdimit të mobilizimit qytetar që tashmë ka hyrë në javën e tretë të tij.
