Protesta qytetare kundër qeverisë ka vijuar edhe gjatë mbrëmjes së sotme, me mijëra qytetarë që kanë marshuar në disa prej akseve kryesore të kryeqytetit, duke e shtrirë tubimin deri në zonën e Astirit.
Pas grumbullimit në sheshin “Skënderbej”, marshimit drejt Kryeministrisë dhe lëvizjes nëpër bulevardet kryesore të Tiranës, protestuesit kanë vijuar rrugëtimin e tyre drejt perëndimit të qytetit, duke mbajtur të njëjtat mesazhe dhe kërkesa që kanë shoqëruar protestën prej 12 ditësh.
“Rama jepe dorëheqjen” ka qenë thirrja më e përsëritur gjatë marshimit, ndërsa pjesëmarrësit kanë deklaruar se nuk do të tërhiqen deri në realizimin e kërkesave të tyre.
Protestuesit kanë theksuar vazhdimisht karakterin qytetar dhe paqësor të lëvizjes, duke deklaruar se tubimi nuk përfaqëson asnjë forcë politike dhe se synon të mbetet i pavarur nga partitë.
Gjatë marshimit janë dëgjuar edhe thirrje të tjera si:
- “Rama ik”
- “Atdheu nuk shitet”
- “Shqipëri e Re”
- “Ju erdhi fundi”
- “Shqipëria është e jona”
Pjesëmarrësit kanë vijuar të kërkojnë dorëheqjen e qeverisë, hetimin e zyrtarëve të lartë për çështje korrupsioni dhe ndryshimin e politikave që, sipas tyre, kanë ndikuar negativisht në jetën ekonomike dhe sociale të vendit.
Ndërkohë, marshimi është zhvilluar pa incidente, nën monitorimin e forcave të rendit, ndërsa organizatorët kanë paralajmëruar se mobilizimi qytetar do të vazhdojë edhe në ditët në vijim.
Protesta e nisur kundër projektit të diskutueshëm në zonën e Zvërnecit është shndërruar në një lëvizje më të gjerë qytetare, me pjesëmarrje të vazhdueshme në Tiranë dhe mbështetje nga komunitetet shqiptare jashtë vendit.
