Protesta qytetare kundër qeverisë ka vijuar edhe në ditën e saj të 12-të, me qindra protestues që kanë marshuar në rrugët e kryeqytetit dhe kanë përsëritur thirrjet për pjesëmarrje më të gjerë të qytetarëve.
Gjatë marshimit, pjesëmarrësit u kanë bërë apel qytetarëve që ende nuk i janë bashkuar lëvizjes, duke i ftuar të lënë pas indiferencën dhe të dalin në mbështetje të asaj që ata e cilësojnë si një revoltë qytetare për ndryshim.
“Bashkohuni me ne”, “Çohuni nga kafja” dhe “Shqipëria ka nevojë për zërin e secilit” ishin disa nga thirrjet që u dëgjuan përgjatë tubimit.
Protestuesit theksuan se mobilizimi duhet të vazhdojë dhe të zgjerohet, duke argumentuar se pjesëmarrja masive është mënyra më e mirë për të adresuar shqetësimet që, sipas tyre, kanë të bëjnë me qeverisjen, korrupsionin, largimin e të rinjve nga vendi dhe mungesën e perspektivës për shumë familje shqiptare.
Marshimi kaloi në disa nga akset kryesore të Tiranës dhe u zhvillua pa incidente, nën vëzhgimin e forcave të policisë. Organizatorët dhe pjesëmarrësit kanë bërë të ditur se protestat do të vijojnë edhe në ditët në vijim, duke kërkuar më shumë mbështetje nga qytetarët në mbarë vendin.
Tubimi i sotëm është pjesë e një serie protestash që po zhvillohen prej gati dy javësh në kryeqytet, ndërsa pjesëmarrësit deklarojnë se do të vazhdojnë të ushtrojnë presion për realizimin e kërkesave të tyre.
