Presidenti amerikan Donald Trump ka komentuar zhvillimet e fundit në Lindjen e Mesme, duke folur për operacionet ushtarake të SHBA-së kundër objektivave iraniane dhe për mundësinë e veprimeve të mëtejshme në rajon.
Në një intervistë për median amerikane Fox News, Trump deklaroi se forcat amerikane kanë kryer sulme ajrore ndaj Iranit, duke theksuar se gjatë natës së kaluar janë përdorur armë me vlerë të konsiderueshme financiare.
“Ne hodhëm bomba me vlerë 250 milionë dollarë mbi Iranin mbrëmë”, deklaroi Trump.
Presidenti amerikan foli gjithashtu për Ishullin Kharg, një pikë strategjike për eksportet energjetike iraniane në Gjirin Persik, duke lënë të kuptohet se ai mbetet një objektiv me rëndësi të veçantë në llogaritjet ushtarake dhe gjeopolitike.
Megjithatë, Trump u shpreh skeptik nëse opinioni publik amerikan do të mbështeste një operacion të drejtpërdrejtë për marrjen nën kontroll të këtij territori.
“Nuk jam i sigurt nëse vendi ka oreks për këtë, sado e mirë të duket”, tha ai.
Duke komentuar raportimet për rezervat e uraniumit të Iranit, Trump minimizoi rëndësinë e çështjes, duke deklaruar se materiali ndodhet në zona shumë të thella dhe të vështira për t’u arritur.
“Ata nuk e prekin dot. Ndodhet shumë thellë. Madje nuk është diçka që më intereson në këtë moment”, u shpreh presidenti amerikan.
Deklaratat e Trump vijnë në një kohë kur tensionet mes Shteteve të Bashkuara dhe Iranit janë përshkallëzuar ndjeshëm, pas shkëmbimit të sulmeve ushtarake në rajonin e Gjirit Persik dhe kërcënimeve reciproke mes palëve.
Analistët vlerësojnë se çdo zhvillim i ri në zonën e Gjirit mund të ketë pasoja të rëndësishme për sigurinë rajonale, tregjet globale të energjisë dhe stabilitetin ndërkombëtar.
