Figura të afërta me Kremlinin kanë prezantuar në Forumin Ekonomik Ndërkombëtar të Shën Petersburgut (SPIEF) një raport që parashikon skenarë të ndryshëm për të ardhmen e Rusisë deri në vitin 2050, duke përfshirë edhe përdorimin e armëve bërthamore, nënshtrimin e Ukrainës dhe shpërbërjen e Bashkimit Europian.
Raporti u prezantua gjatë një paneli mbi “kërcënimet civilizuese ndaj Rusisë” nga biznesmeni dhe ideologu konservator Konstantin Malofejev, së bashku me filozofin Aleksandër Dugin dhe ish-oficerin e inteligjencës ruse Andrei Bezrukov.
Sipas autorëve, Rusia përballet me sfida të mëdha në pesë fusha kryesore: gjeopolitikë, ideologji, demografi, ekonomi dhe teknologji. Përballë këtyre sfidave, raporti paraqet tre skenarë të mundshëm zhvillimi.
Skenari i parë, i quajtur “inercial”, parashikon një konflikt të ngrirë në Ukrainë dhe vazhdimin e rivaliteteve globale deri në vitin 2050.
Skenari i dytë, i cilësuar si “i keq”, parashikon humbjen e Rusisë në luftën me Ukrainën, anëtarësimin e Kievit në NATO dhe dobësimin e ndikimit rus në rajon.
Ndërsa skenari i tretë, të cilin autorët e konsiderojnë si më të favorshmin për Rusinë, përfshin përdorimin e armëve bërthamore, kontrollin e Kievit dhe Odesës, nënshtrimin e Ukrainës dhe shpërbërjen e Bashkimit Europian.
Raporti propozon gjithashtu një sërë masash të brendshme, mes tyre “dezperëndimizimin” e Rusisë, forcimin e autokracisë, promovimin e modelit tradicional të familjes dhe hartimin e një kushtetute të re.
Debati u shoqërua edhe me deklarata të forta nga ish-agjenti i inteligjencës ruse Andrei Bezrukov, i cili argumentoi se Rusia duhet të tregojë se është e gatshme të përdorë forma të ndryshme presioni strategjik, përfshirë edhe kapacitetet biologjike dhe infrastrukturore.
Në fund të diskutimit, filozofi Aleksandër Dugin deklaroi se disa prej ideve të paraqitura tashmë po zbatohen pjesërisht nga shteti rus dhe bëri thirrje për hapa edhe më të vendosur në këtë drejtim.
Deklaratat e bëra gjatë forumit kanë ngjallur reagime dhe shqetësime ndërkombëtare, pasi përfshijnë skenarë që parashikojnë përshkallëzim të konfliktit në Evropë dhe përdorimin e armëve me pasoja globale.
