Protestat kundër projektit të planifikuar në zonën e Zvërnecit po zgjerohen në disa qytete të vendit. Mbrëmjen e së premtes, qytetarë dhe aktivistë në Elbasan zhvilluan një tubim publik në mbështetje të kauzës kundër ndërtimit të resortit në zonën bregdetare të Vlorës.
Me pankarta dhe thirrje kundër qeverisë, pjesëmarrësit kërkuan anulimin e projektit, duke argumentuar se ai rrezikon mjedisin dhe interesin publik. Gjatë protestës u artikuluan edhe kërkesa politike, përfshirë dorëheqjen e kryeministrit Edi Rama dhe rishikimin e disa nismave ligjore të qeverisë.
Protestuesit shprehën kundërshtimin e tyre edhe ndaj Paketës së Maleve, duke ngritur shqetësime për ndikimin që, sipas tyre, mund të ketë në administrimin e pronave dhe zhvillimin e zonave malore.
Sipas qytetarëve të pranishëm, projektet që prekin pasuritë natyrore dhe territorin duhet t’i nënshtrohen konsultimeve të gjera me komunitetet lokale dhe grupet e interesit, përpara se të miratohen.
Tubimi në Elbasan u zhvillua në mënyrë paqësore dhe nën monitorimin e forcave të rendit, ndërsa organizatorët paralajmëruan se mobilizimi qytetar do të vijojë edhe në ditët në vijim.
