Momente tensioni janë regjistruar mbrëmjen e së martës gjatë protestës së zhvilluar para Kryeministrisë në Tiranë, ku një grup qytetarësh tentoi t’i afrohej hyrjes kryesore të godinës qeveritare.
Lëvizja e tyre shkaktoi reagime të menjëhershme nga protestues të tjerë, të cilët kërkuan ruajtjen e qetësisë dhe shmangien e çdo veprimi që mund të çonte në përplasje apo incidente. Nga turma u dëgjuan vazhdimisht thirrjet “Jo provokime!”, në përpjekje për të mbajtur protestën paqësore.
Pavarësisht tensioneve të çastit, tubimi vijoi normalisht, ndërsa organizatorët dhe pjesëmarrësit përsëritën apelin për vetëpërmbajtje dhe respektim të karakterit qytetar të protestës.
Protesta është pjesë e mobilizimit kundër projektit turistik në Zvërnec, të cilin qytetarët e kundërshtojnë duke argumentuar se cenon interesin publik dhe mjedisin. Ndërkohë, pjesëmarrësit kanë kërkuar që zëri i tyre të dëgjohet nga institucionet dhe vendimmarrësit.
Forcat e rendit kanë monitoruar situatën gjatë gjithë kohës, ndërsa deri tani nuk raportohen incidente serioze apo përplasje fizike. Protestuesit kanë bërë të qartë se synimi i tyre mbetet vazhdimi i kundërshtimit përmes formave paqësore dhe demokratike.
