Dhjetëra qytetarë janë mbledhur mbrëmjen e së dielës përpara Ministrisë së Brendshme në Tiranë, në shenjë proteste pas incidenteve të raportuara gjatë tubimit të zhvilluar në Zvërnec.
Protestuesit kanë shprehur shqetësimin e tyre lidhur me pamjet e publikuara nga ngjarja, ku shfaqen përplasje mes pjesëmarrësve në protestë dhe punonjësve të sigurisë private, duke kërkuar sqarime dhe reagim institucional për mënyrën e menaxhimit të situatës.
Reagimet janë shtuar pas publikimit të videove që tregojnë momente tensioni në terren, ku një protestues shihet duke u shoqëruar me forcë gjatë përplasjeve. Sipas pretendimeve të ngritura nga organizatorët dhe pjesëmarrësit në protestë, gjatë incidentit janë përdorur edhe mjete si spray me piper.
Në qendër të kritikave është vendosur kompania private e sigurisë e angazhuar në zonë, ndërsa protestuesit kërkojnë hetim të plotë të ngjarjes dhe verifikim të veprimeve të ndërmarra gjatë përplasjes.
Tubimi para Ministrisë së Brendshme është zhvilluar nën masa sigurie dhe deri në momentin e raportimit nuk janë shënuar incidente mes protestuesve dhe forcave të rendit.
Ngjarjet në Zvërnec kanë rikthyer në vëmendje debatin mbi projektin e investimit turistik në zonë, duke nxitur reagime të forta si nga mbështetësit ashtu edhe nga kundërshtarët e projektit. Ndërkohë, qytetarët e mbledhur në Tiranë kërkojnë transparencë, respektim të të drejtës së protestës dhe zbardhje të plotë të rrethanave të incidentit të ndodhur në Zvërnec.
