Policia Kufitare ka ndërhyrë pas një rasti të rrezikimit të pushuesve në zonën e Karaburunit, ku një mjet lundrues tip Jet Ski ka shkelur perimetrin e sigurisë duke u afruar shumë pranë zonës së notimit.
Ngjarja u denoncua nga qytetarët, të cilët dërguan pamje filmike në Policinë e Shtetit, ku shihej mjeti lundrues duke lëvizur në afërsi të pushuesve dhe duke rrezikuar sigurinë e tyre.
Pas verifikimeve të menjëhershme, shërbimet e Policisë Kufitare të Stacionit Triport, në bashkëpunim me Njësinë Policore Detare, bënë të mundur identifikimin dhe ndalimin e Jet Ski-t, ndërsa ai po afrohej pranë molit të peshkimit në territorin e Triportit.
Sipas njoftimit zyrtar, mjeti lundrues u bllokua në pikën e posaçme të bllokimit pranë SMIL-it, ndërsa drejtuesi i tij, shtetasi me iniciale E. U., u ndëshkua me masë administrative prej 500 mijë lekësh të rinj për shkeljen e rregullave të sigurisë detare.
Autoritetet apelojnë për respektimin rigoroz të perimetrave të sigurisë gjatë sezonit turistik, duke paralajmëruar masa të forta ndaj çdo drejtuesi mjeti lundrues që rrezikon jetën e pushuesve në plazhe.
