Kuvendi Kombëtar i Partia Demokratike e Shqipërisë ka marrë edhe një mesazh mbështetës nga Gjermania, ku deputeti i Bundestagut nga radhët e CDU, Peter Beyer, u bëri thirrje demokratëve të lënë mënjanë konfliktet e brendshme dhe të fokusohen te objektivi madhor i integrimit europian.
Në mesazhin e tij drejtuar delegatëve të Kuvendit, Beyer theksoi se Shqipëria ndodhet përballë një momenti vendimtar në rrugën drejt Bashkimit Europian dhe se opozita ka një rol të rëndësishëm për të luajtur në këtë proces.
Deputeti gjerman nënvizoi se pritshmëritë e partnerëve europianë ndaj Partisë Demokratike janë të larta, duke kërkuar që forca më e madhe opozitare të tregojë përgjegjësi politike dhe vizion për të ardhmen e vendit.
“Ka ardhur koha për unitet dhe jo për përçarje”, ishte thelbi i mesazhit të tij, ndërsa theksoi se energjitë duhet të përqendrohen te integrimi europian, lufta kundër korrupsionit dhe forcimi i shtetit ligjor.
Beyer vlerësoi gjithashtu marrëdhëniet e CDU-së me demokratët shqiptarë dhe shprehu bindjen se Shqipëria ka potencialin për të ecur përpara drejt familjes europiane, nëse institucionet dhe forcat politike punojnë me përgjegjësi dhe vizion afatgjatë.
Mesazhi i ardhur nga Berlini u konsiderua si një sinjal i rëndësishëm mbështetjeje për opozitën shqiptare në një moment kur Partia Demokratike po diskuton reformimin e strukturave të saj dhe strategjinë politike për vitet e ardhshme.
