Zjarri i madh që përfshiu pasditen e së premtes masivin me pisha në zonën e Ranës së Hedhun, pranë Shëngjin, është vënë nën kontroll falë ndërhyrjes së shpejtë të forcave zjarrfikëse dhe strukturave emergjente.
Flakët, të favorizuara nga bimësia e dendur dhe era në zonë, mobilizuan ekipe zjarrfikëse nga Lezha, Tirana dhe Vau i Dejësit. Pas disa orësh pune intensive, situata është stabilizuar dhe po shkon drejt shuarjes së plotë.
Nënkryetari i Bashkisë së Lezhë, Fatjon Zefi, deklaroi se prioriteti kryesor ka qenë izolimi i vatrës së zjarrit dhe parandalimi i përhapjes së flakëve drejt zonave të tjera apo strukturave akomoduese pranë bregdetit.
Sipas tij, aktualisht po kryhet rikontrolli i terrenit për të shmangur çdo mundësi rindezjeje, ndërsa në bashkëpunim me Policinë e Shtetit kanë nisur hetimet për të përcaktuar shkaqet e zjarrit, të cilat mbeten ende të panjohura.
Fatmirësisht, flakët nuk kanë rrezikuar hotele, biznese apo objekte të tjera turistike në zonë, ndërsa autoritetet vijojnë monitorimin e situatës për shkak të pranisë së erës.
Rana e Hedhun është një nga zonat më të frekuentuara turistike të veriut të vendit dhe pothuajse çdo vit përballet me episode zjarresh gjatë sezonit të verës, duke e bërë monitorimin dhe reagimin e shpejtë një prioritet për institucionet vendore dhe emergjencat civile.
