Partia Demokratike pritet të zhvillojë nesër një nga ngjarjet më të rëndësishme të saj organizative, Kuvendin Kombëtar, ku do të nisë zyrtarisht procesi i ristrukturimit dhe rinovimit të organeve drejtuese të partisë.
Deputeti demokrat Luan Baçi deklaroi se delegatët do të votojnë në mënyrë të fshehtë për zgjedhjen e anëtarëve të rinj të Këshillit Kombëtar, duke e cilësuar procesin si një hap të rëndësishëm në ripërtëritjen e Partisë Demokratike.
Sipas Baçit, rreth 1500 delegatë do të zgjedhin mes më shumë se 300 kandidaturave, ndërsa vetëm 150 prej tyre do të bëhen pjesë e Këshillit Kombëtar. Ndërkohë, anëtarët aktualë të këtij forumi rikandidohen automatikisht sipas statutit të partisë.
Procesi nuk përfundon me kaq. Brenda 7 deri në 10 ditëve pas zgjedhjes së Këshillit Kombëtar, do të zhvillohen votimet për strukturat më të larta drejtuese të PD-së, përfshirë Kryesinë, Sekretariatin, nënkryetarët, sekretarin e përgjithshëm dhe drejtuesit e departamenteve.
Baçi e cilësoi këtë proces si pjesë të një reformimi të gjerë të forcës më të madhe opozitare, pas një periudhe të vështirë politike që, sipas tij, u karakterizua nga humbja e vulës, siglës, flamurit dhe financimeve të partisë.
Ai theksoi se mbijetesa e PD-së gjatë viteve të fundit ishte rezultat i qëndresës së demokratëve dhe procesit të rithemelimit të udhëhequr nga Sali Berisha.
“Ne kemi një detyrim shumë të madh ndaj demokratëve që qëndruan pranë partisë në momentet më të vështira. Është një borxh politik dhe moral që duhet shlyer me përfaqësim dhe meritokraci”, u shpreh Baçi.
Kuvendi Kombëtar i së shtunës pritet të shënojë nisjen e një faze të re organizative për PD-në, ndërsa drejtuesit demokratë synojnë të ndërtojnë ekipin që do të udhëheqë opozitën në sfidat e ardhshme politike.
