Partia e Lirisë ka prezantuar një program të ri politik të fokusuar te rinia, arsimi dhe punësimi, duke premtuar masa konkrete për uljen e kostove të studimeve dhe rritjen e mbështetjes për të rinjtë.
Në deklaratën zyrtare, partia thekson se investimi tek të rinjtë është “kusht themelor për zhvillimin dhe të ardhmen e Shqipërisë”, ndërsa vendos në qendër edukimin, aftësimin profesional dhe integrimin në tregun e punës.
Një nga premtimet kryesore të programit është përgjysmimi i shpenzimeve për studentët, përmes uljes së tarifave universitare dhe krijimit të një pakete mbështetëse që do të përfshijë kostot e banimit, ushqimit, transportit dhe mjeteve mësimore.
Programi parashikon gjithashtu zgjerimin e praktikave të detyrueshme të punës (internship) në programet Bachelor dhe Master, me synimin për të afruar studentët me tregun e punës që gjatë studimeve.
Sipas Partia e Lirisë, do të masivizohet edhe nisma “Mëso dhe Fito”, e cila kombinon arsimin profesional me praktikat e paguara gjatë vitit shkollor.
Në planin ekonomik, propozohet subvencionim për kompanitë që punësojnë të rinj deri në moshën 29-vjeçare, duke mbuluar sigurimet shoqërore, shëndetësore dhe kostot e trajnimit për punonjësit e rinj.
Një tjetër pikë e programit lidhet me kërkimin shkencor dhe inovacionin, ku synohet rritja e financimit në nivelin mesatar të vendeve të Bashkimi Evropian, si dhe ngritja e inkubatorëve për startup-et teknologjike.
Në aspektin arsimor, partia propozon gjithashtu që sporti të marrë më shumë peshë në sistemin akademik, duke u kthyer në një komponent me vlerë të shtuar në kreditet universitare.
Programi përfshin edhe ngritjen e qendrave për asistimin e sipërmarrësve të rinj, trajnime për menaxhim biznesi dhe mbështetje për zhvillimin e ideve inovative.
