Analisti Enton Abilekaj ka reaguar ashpër lidhur me procesin e integrimit të Shqipërisë në Bashkimi Europian, duke ngritur pikëpyetje mbi standardet që po aplikohen nga Brukseli ndaj institucioneve shqiptare.
I ftuar në një studio televizive, Abilekaj deklaroi se procesi i integrimit po përdoret më shumë si mekanizëm legjitimues për një shtet me institucione të dobëta dhe të kapura, sesa si instrument modernizimi demokratik.
Sipas tij, ndërhyrja e ndërkombëtarëve në raportin mes Parlamentit dhe SPAK ka qenë kontradiktore, pasi kushtet e vendosura fillimisht për bashkëpunimin me drejtësinë u lanë më pas në harresë.
“Ata kërkuan bashkëpunim të Parlamentit me drejtësinë, kërkuan imunitet dhe mbështetje për hetimet. Por më pas i harruan vetë këto kushte dhe hapën negociatat”, u shpreh analisti.
Enton Abilekaj argumentoi se integrimi europian nuk duhet parë vetëm si proces teknik apo politik, por si një përpjekje reale për modernizimin e shtetit dhe funksionimin e institucioneve të pavarura.
“Kur gjyqësori, ekzekutivi dhe legjislativi nuk funksionojnë siç duhet, nuk mund të flasim për shtet modern. Sot kemi një shtet feudal me institucione bajraktare dhe megjithatë procesi i integrimit vazhdon”, deklaroi ai.
Analisti iu referua edhe raporteve të institucioneve europiane, duke theksuar se vetë dokumentet zyrtare të Komisioni Europian flasin për korrupsion, pastrim parash, ndikim të krimit të organizuar dhe probleme me zgjedhjet.
Sipas tij, rasti i Shqipërisë po i ngjan vendeve të tjera të Europës Lindore, si Romania dhe Bulgaria, të cilat u anëtarësuan në BE pa pasur institucione plotësisht funksionale.
“Ne po ecim drejt Bashkimit Europian me një shtet jo modern dhe kjo po legjitimohet politikisht. Problemi nuk është vetëm Edi Rama, por modeli i shtetit që po mbetet i pandryshuar”, u shpreh ai.
Në fund, Abilekaj ngriti dyshime mbi mënyrën sesi janë trajtuar kushtet e vendosura më herët nga partnerët europianë, duke përmendur edhe “20 kushtet” e Bundestagut gjerman, të cilat sipas tij u zhdukën pa asnjë shpjegim.
“A është Bashkimi Europian përfaqësues i vlerave demokratike, apo një organizatë gjeopolitike që pranon gjithçka për interesa strategjike?”, përfundoi analisti.
