Sali Berisha është rikonfirmuar në krye të Partia Demokratike pas procesit të votimit të zhvilluar këtë të shtunë në të gjithë vendin.
Sipas të dhënave paraprake të publikuara nga strukturat e Partisë Demokratike, Berisha ka marrë rreth 37 mijë vota nga anëtarësia demokrate, duke siguruar një mandat të ri në drejtimin e opozitës.
Procesi u zhvillua me Berishën si kandidat të vetëm në garë, ndërsa gjatë gjithë ditës pati debate dhe akuza nga figura kritike brenda PD-së lidhur me pjesëmarrjen dhe standardet e votimit.
Shifrat e publikuara kanë nxitur diskutime edhe për nivelin e pjesëmarrjes në disa qarqe të rëndësishme. Në Durrës, Berisha raportohet se ka marrë 892 vota, ndërsa në Korçë janë regjistruar 392 vota në mbështetje të tij.
Mbështetësit e Berishës e kanë konsideruar rezultatin si një konfirmim të lidershipit të tij dhe të mbështetjes që ai gëzon në bazën e Partisë Demokratike pas krizave dhe përçarjeve të viteve të fundit.
Nga ana tjetër, kritikët brenda opozitës kanë vënë në pikëpyetje nivelin real të pjesëmarrjes dhe kanë kërkuar transparencë më të madhe për procesin e votimit dhe numërimit.
