Deputeti i Partia Demokratike e Shqipërisë, Luçiano Boçi, ka mbrojtur procesin zgjedhor për kreun e partisë, duke e cilësuar atë si demokratik, transparent dhe unifikues për demokratët.
Në një deklaratë për mediat nga selia blu, Boçi u shpreh se pjesëmarrja në votim ka qenë e lartë në të gjithë vendin dhe se procesi po zhvillohet normalisht.
Ai theksoi se edhe një referendum politik mbetet një formë zgjedhjeje dhe se demokratët kanë dhënë vetë verdiktin e tyre përmes pjesëmarrjes në votim.
Sipas Boçit, PD-ja nuk duhet të rikthehet më në përçarje dhe konflikte të brendshme, por të fokusohet te bashkimi dhe sfidat politike përballë qeverisë.
Deputeti demokrat nënvizoi se proceset unifikuese janë të domosdoshme për funksionimin e demokracisë së brendshme në parti.
Deklaratat e Boçit vijnë në një moment debatesh të forta brenda PD-së, ku figura si Ervin Salianji dhe Evi Kokalari kanë akuzuar drejtimin e partisë për proces farsë dhe mungesë gare reale, ndërsa Sali Berisha kandidon i vetëm për kreun e partisë.
