Romir Saraçi ka komentuar ashpër raportin më të fundit të Bashkimi Europian për Shqipërinë, duke deklaruar se dokumenti përbën “pasqyrën reale” të problemeve me korrupsionin, zgjedhjet dhe pastrimin e parave në vend.
Gjatë një debati televiziv me gazetaren Sonila Meço, Saraçi u shpreh se Brukseli tashmë ka evidentuar qartë problematikat që, sipas tij, pengojnë integrimin europian të Shqipërisë.
Ai deklaroi se raporti i fundit i BE-së përmban sinjale të forta për nevojën e përgjegjësisë politike dhe penale në rastet e aferave të mëdha korruptive.
“Fatmirësisht Bashkimi Europian po kthen sytë edhe nga Ballkani. Ky është lajm i mirë për shqiptarët, sepse Shqipëria nuk mund të trajtohet më si pronë private e askujt”, u shpreh Saraçi.
Gazetari komentoi edhe referencat e raportit për çështjen e imunitetit të Belinda Balluku, duke pretenduar se mesazhi i institucioneve europiane është i lidhur me nevojën për hetim të plotë dhe pavarësi të drejtësisë.
“Në momentin që BE shpreh shqetësim për mosheqjen e imunitetit, mesazhi është i qartë: pa hetim dhe pa ndëshkim të korrupsionit nuk mund të ketë integrim real”, deklaroi ai.
Saraçi foli gjithashtu për problematikat që raporti evidenton në lidhje me zgjedhjet, administratën publike dhe pastrimin e parave.
Sipas tij, raporti tregon se Shqipëria vazhdon të ketë mangësi serioze në standardet demokratike dhe sundimin e ligjit.
“Raporti rendit shumë probleme që lidhen me zgjedhjet, patronazhimin politik dhe pastrimin e parave. Bashkimi Europian po thotë qartë se Shqipëria ende nuk është gati”, tha ai.
Në fund, Saraçi u bëri thirrje qytetarëve që ta shohin raportin si një reflektim mbi realitetin e vendit dhe të kërkojnë më shumë llogaridhënie nga politika.
“Qytetarët duhet të ngrenë stekën e reagimit dhe të kërkojnë përgjegjësi si nga mazhoranca, ashtu edhe nga opozita”, përfundoi gazetari.
