AAPSK ka kërkuar forcimin e bashkëpunimit me njësitë e pushtetit vendor për përdorimin e pasurive të konfiskuara në funksion të komunitetit dhe shtresave në nevojë.
Deklarata u bë gjatë forumit “Forcimi i sistemit lokal të mbrojtjes sociale, financimi dhe strukturat”, i zhvilluar në Tirana, ku AAPSK prezantoi rolin dhe mundësitë konkrete për përdorimin social të aseteve të sekuestruara dhe konfiskuara.
Kryeadministratorja e AAPSK-së, Risena Xhaja, deklaroi se Shqipëria ka bërë progres në forcimin e shtetit ligjor dhe luftën kundër krimit të organizuar, por sfida kryesore mbetet rikthimi i pasurive me origjinë kriminale në dobi të qytetarëve.
“Ne besojmë se asetet që dikur kanë qenë produkt i aktiviteteve kriminale duhet të rikthehen në shërbim të komunitetit, duke kontribuar në përmirësimin e jetës së qytetarëve dhe forcimin e kohezionit social”, u shpreh Xhaja.
Sipas saj, bashkitë luajnë një rol kyç pasi janë institucionet më pranë qytetarëve dhe njohin nevojat konkrete të komuniteteve. Ajo theksoi se bashkëpunimi ndërmjet AAPSK-së dhe pushtetit vendor mund të krijojë mundësi reale për përdorimin e pasurive të konfiskuara si qendra komunitare, shërbime sociale dhe projekte në mbështetje të shtresave vulnerabël.
Forumi u organizua në partneritet me Ministria e Financave dhe Agjencia për Decentralizimin e Pushtetit Vendor, me mbështetjen teknike të UNICEF, në kuadër të programit “Askush të mos mbetet pas”.
AAPSK riafirmoi angazhimin për transparencë, eficiencë dhe bashkëpunim institucional në administrimin e pasurive të sekuestruara dhe konfiskuara, duke theksuar se praktikat europiane tregojnë se këto asete mund të shndërrohen në instrumente të drejtësisë sociale dhe zhvillimit lokal.
